Pro Silanus

Pubblica in: 

Pro Silanus

Silanus chi t'agattas collocada
a centru de sa terra Marghinesa,
in d'una amena zona ses'istesa
sa tua est magnifica contrada.

De olias possedis bon' intrada.
Antigos monumentos pro bellesa
non mancana in sa terra Silanesa
e tottu custu vantaggios ti dada.

In armentos bovinos e ovinos
ses, in sa pastorizia avanzada,
e s'Istadu t'hat fattu carch'istrada
 non tinde deves certu ismentigare.
Fertilissimos sos tuos terrinos,
si puru in parte mezzanos chend'hada.
Ma tenes un'industria famada
c'hat sistemadu medas cittadinos.
Sa calidade 'e sa tua carchina
est usada in tottu sa Sardigna.
Silanus, ses in s'Isola ladina,
pro su bene ancora pius t'impigna.

Tue, Silanus, in tempus passadu,
has tentu zente forte e generosa.
Medas fizzos a sa Patria has dadu
ma pro tantu nde sias orgogliosa.

De Vittoriu Demontis ti amenta,
cand'in sa prima gherra mondiale
fidi, su pius giovane ufficiale
de s'Italia, in sa lotta cruenta.

E de Ciccittu Tola "aviatore"
non t'ismentighes manc'unu minutu,
de s'aria cumbattente de valore
aereos inimigos ha distruttu.

Gesuinu Mastinu in Parlamentu
cando fid Segretariu de Istadu,
amèntadi, chi bene had'operadu:
dignu fizzu de aere in amentu.
 
Ancora naro, Silanus, pro de,
chi su frade de custu deputadu
fidi eccellente illustre avvocadu
difensore de unu Vice Re.
 
 
Su pagu ch'isco in su fogliu iscrio,
 ma non ti siat mai ismentigadu
 chi tue sos natales has dadu
 a s'Eccellenza Vescovo del Rio.
Su Sindigu Aielli,"Su Maggiore",
ischis chi ti ha bene amministradu,
 in cussos annos provas ti ha dadu
 chi ti teniada affettu e amore.

Pro de s'est veramente dedicadu
 attivamente in su bonu operare
 e de cantu ha realizzadu
 non tinde deves certu ismentigare.

A Tottoi Deriu, s'Insegnante,
lu tenzas in sa mente e in su coro.
Ca sempre in su dovere fid zelante,
l'han premiadu cun medaglia 'e oro.
 
Sinceru, affettuosu in su trattare
fid cun s'intera populazione.
Tottu nois devimos amentare
sa bonidade 'e sa sua persone.


Persone fid de sas pius sinceras,
pro tottus issu teniada istima.
Peccadu chi oladu si ch'est prima
de cumprire sas chentu primaveras.

A Niola comente caru fizzu
appas presente in mesu 'e sos bios.
Dadu hada a su mundu sos adios
essende ancora fiorente lizzu.

De sa Patria fidi innamoradu,
dignamente lu tenzas in memoria.
In battaglia cobertu s'est de gloria
lu giamesin su pluri decoradu.

Has tentu e has bon'attera zente,
persones chi si faghen ammirare,
pro tottu cantos sias riverente,
ses'in dovere de los istimare.

Pedo iscusa 'e su miseru cantu
ma, de custa zente ammentadinde.
Sa gioventude chi oe est beninde,
ti potada onorare atteretantu.

 
Giuseppe Giau